Entrevue mam Inneminister Léon Gloden

Den 29.06.2026 huet de Comité vum SNPPL sech mam Innenminister Léon Gloden getraff. Et war en oppenen Austausch bei deem de Minister eis net nëmmen nogelauschtert huet, mee och konkret Pisten zur Verbesserung proposéiert huet.

Personalvertrieder am Verwaltungsrot
No enger kuerzer Präsentatioun vun eise Leit hu mir de Vertrieder aus dem CA d’Wuert ginn. Si hunn déi schwéierfälleg Walprozedur via Recommandé ugeschwat an och de Fait, dass si bei Decisiounen déi d’Personal betreffen net derbäi dierfen sinn, well dës am Huis Clos geholl ginn.
Waat de Huis clos ugeet huet de Minister de Status Quo verteidegt an op de System an de Gemenge verwisen. Wa de Walsystem ugeet, do wier een amgaangen dat betreffend Reglement Grand-Ducal ze iwwerschaffen.
Duerno si mir direkt déi Themen ugaangen déi eis an de leschte Méint a Joren am meeschte beschäftegen.

Reform vum CGDIS-Gesetz
D’Gewerkschaft begréisst, dass de Minister d’Gesetz op déi lescht Ligne droite bruecht huet. Dëst Gesetz dréit enger ganzer Partie vun eise Fuerderungen Rechnung, notamment der Fonctionnarisatioun vun techneschen an administrativen Employéen, déi initial schonn hätt sollen 2018 stattfannen.

Den akute Personalmangel an d’Attraktiviéit vum Beruff Pompjee
Den SNPPL huet dem Minister en realistescht Bild vun der aktueller Personalsituatioun opgezeechent. Mir hunn drop higewisen, dass d’Aarbechtsbelaaschtung fir d’Leit um Terrain all Dag méi grouss gëtt an, dass feelend Recrutementer an en bescheidenen Taux de Réussite nom Stage dozou bäidroen, dass d’Leit wéineg Hoffnung op eng kuerzfristeg Verbesserung hunn. Mir hunn och bemierkt, dass gefillt ëmmer méi Kolleegen sech no Carrièresméiglechkeeten ausserhalb vum CGDIS an notamment bei der Police ëmkucken.

Op d’Fro wat d’Leit sech dann bei der Police erwaarden wat si net bei de Pompjeeën  kréien, loung et no, dass si bei der Police eng B-Carrière kënne kréien, op déi si am CGDIS net onbedéngt eng Chance gesinn. An och déi mangelnd Wäertschätzung vun der Aarbecht am SAP-Beräich, déi de Groussdeel vun der Aarbechtszäit vun de Kollegen ausmécht dréit net zur Attraktivitéit vum Pompjeesberuff bäi.
De Minister huet heizou bemierkt, dass mat der Reform vum CGDIS-Gesetz d’Limitatioun vun 12% fir d’B-Carrière ewechfält an de Responsabelen un d’Häerz geluecht eng Etude de Satisfaction bei de Beruffspompjeeën duerchzeféieren.
Sou eng Etude kéint een och notzen fir ze kucken wéi eng Facteuren beim Taux de réussite eng Roll spillen.


Mir hate wéi scho gesot en gutt präparéierten Minister vis- à- vis vun eis sëtzen an trotzdeem huet hien iwwerrascht gewierkt wéi mir him erkläert hunn, dass haut en Ambulancier um liewege Patient, op legaler Basis keng eenzeg Mesure dierf duerchféieren déi iwwert en duerchschnëttlechen éischt Hëllef-Cours erausgeet. Mir hun him Beispiller, wei den Sauerstoff, den Wendl-tubus, an awer och Epi-pen genannt.
Hien huet doropshin prompt seng Equipe ugewisen eng Entrevue mam Santésministère ze plangen.
Net ziele gelooss huet den SNPPL den Awand, aus der Equipe vum Minister, dass dëst keen einfache Wee wäert ginn.
Mir hunn eis nach eemol drop behaapt, dass eis Leit d’Formatioun, d’Moyennen an d’Kompetenzen brauchen fir déi Situatiounen ze meeschteren déi si am Alldag begéinen, an dass et op deem Niveau an de leschten 8 Joer net ee Schrëtt no vir gaangen ass.
Ausserdeem hu mir nach d’Potential ënnerstrach déi dës Entwécklung fir déi national Resilienz géing bidden.
Mir wäerten op alle Fall um Ball bleiwen, an och wann et sécherlech just en Ufank war, sou si mir dach mat engem positive Gefill aus dëser Entrevue erausgaangen.

Tripartitesaccord:

Den 8ten Juni 2026 waren mir als SNPPL op der Conférence des Comités restreinte vun der CGFP vertrueden. Mir kruten dei eenzel Punkten vum Tripartitesaccord tëscht Regierung, Patronat a Gewerkschaftsvertrieder erkläert an zesummegefaasst. Mir als SNPPL fannen, dass et en ganz raisonnabelen Accord ass an hunn en dofir matgestëmmt. Fir weider Detailer klickt op den Link:
https://www.cgfp.lu/actualites/2026/approbation-de-l-accord-tripartite-par-la-cgfp

Mir freeën eis dech ze begréissen op eis

Generalversammlung

Datum: Mëttwoch 4.Juni 2025

Auerzäit: 18.30 hrs

Adresse: Siège vun der CGFP (488 Rte de Longwy L- 1940 Märel Luxembourg)

Ordre du jour:

  • Begréissung vum President
  • Aktivitéitsrapport vun eisem Sekretär
  • Usprooch vum President
  • Unhuele vun den neie Statuten (Procuratioun)
  • Keesebericht
  • Reconstitutioun vum Comité
  • Fräi Aussprooch

Natierlech ass fir ee Patt an ee gudde Maufel gesuergt.

FGEC an Minister Serge Wilmes

De 05. Februar huet sech dann d’FGEC mam Minister vun der Fonction publique Serge Wilmes getraff. Et wor eng flott a konstruktiv Entrevue an der de Schwéierpunkt op follgend Theme geluecht gouf.

D’Harmoniséierung vun de Carrière inférieures ,hei huet de Minister sech optimistesch gewisen, dass d’Gesetz am Fréijoer kéint gestëmmt ginn.

Preretraite am 57.Liewensalter no 20 Joer Schichtaarbecht: Hei gouf vu gewerkschaftlecher Säit nach emol Drock gemaach a gefuerdert, dass et an dësem Dossier endlech weidergeet.

E weidert wichtegt Thema war d’Harmoniséierung vun alle Carrièrë beim Staat. D’FGEC huet hei nach emol drop higewisen, dass d‘C-Carrière däitlech no uewe misst ugepasst ginn. Well ochdéi iewescht Carrièrë missten adaptéiert gi, gëtt dëst en Deel vun engem Aarbechtsgrupp mat der CGFP.

Den SNPPL war hei duerch säi President Bob Jungers vertrueden, den och Member am Comité vun der FGEC ass.

Feiermelder 2022/03

Kuerz virun der Summervakanz hu mir eis fir e reegelméissegen Austausch mat dem Comité Directeur gesinn den Ordre du Jour wor nawell gutt gefëllt, hei géinge mir gären verschidde Punkten méi genee beliichten.

Eng vun eisen Haaptsuergen ass am Moment de Recrutement, och mat méi engem einfache Sportstest konnt een hei kee grousse Succès verbuchen, an d’Konkurrenz am Secteur ass momentan grouss.
Dofir ass et enorm wichteg den Job vum Beruffspompjee attraktiv ze halen!

An dem Zesummenhang hu mir och nach emol widderholl, dass et fir eis eng Selbstverständlechkeet ass, dass de Pompjee déi Zäit an der hie sech op säin Déngscht virbereet, als Aarbechtszäit unerkannt kritt, dëst ass duerch international Urteeler confirméiert an gëtt och an anere Verwaltungen sou ëmgesat.

„Feiermelder 2022/03“ weiterlesen

Feiermelder 2022/02

An de leschten Wochen hate mir gläich zwou Reuniounen bei deenen d’Gesondheet an d’Wuelbefannen vun eise Kolleegen am Mëttelpunkt steet

Eng Delegatioun hat sech  mam neien Directeur médical, dem Dr. Pierrard getraff.

Haaptthema vun dëser Reunioun war de Médico.

Méi konkret hu mir gefuerdert, dass:

  • d’Käschten fir zousätzlech Ënnersichungen déi vum Médico gefrot ginn solle vum CGDIS iwwerholl ginn.
  • de Médico soll sou opgestallt ginn, dass en do ass fir de Gesondheetszoustand vun den Agenten ze kontrolléieren, a kee verstoppten Leeschtungstest soll duerstellen.
  • eng ganz Rei Inkoherenzen tëschent de verschiddene Statuten mussen an Ugrëff geholl ginn.
Et war een flotten an oppenen Austausch, an dem et och drëm gaangen ass wéi de Service an Zukunft kann weider opgestallt ginn, fir och den Suivi vun den Agente besser ze encadréieren.
 
Och hei sinn déi nächst Reuniounen scho festgeluecht a sou bal et hei konkret Resultater gëtt hale mir Iech um Lafenden.

Mir hunn eis mat dem Service Developpement RH vun der Ressource humaine getraff. Ganz kloer stoung hei de mënschlechen Volet am Mëttelpunkt vun der Entrevue.

Wou vill Léit sinn an wou vill geschafft gëtt, do sinn sozial Konflikter an Ermiddung op der Aarbechtsplaz duerchaus onvermeidlech.
Mir hunn no Weeër gefrot eis Léit besser ze ënnerstëtzen an och gekuckt wou een eng konstruktiv Zesummenaarbecht kann obbauen fir dat keen am System verluer geet oder op der Streck bléift.
Eis ass alleguer kloer dat den Alldag op enger Aarbechtsplaz belaaschtend kann sinn, dëst dierf awer weder kuerz- nach laangfristeg op d’Käschten vun de Leit hirer Gesondheet goen. Duerfir ass et wichteg an Zukunft preventiv virzegoen dass d’Leit op laang Siicht Freed un hirer Aarbecht hunn, well just esou kann eng gutt Qualitéit um Terrain eraus kommen.
Mir waren frou iwwert déi oppen Aart a Weis an eisen Reuniounen an mir freeën eis op eng konstruktiv Zesummenaarbecht am Interêt vun allen Acteuren.